Me rastin e festës së Vitit të Ri 2013, Princi Leka II i është
drejtuar popullit shqiptar me një mesazh urimi. Në mesazhin e tij të
fundvitit Princi Leka II ka thënë se “Jo gjithmonë historia ka qenë në
favorin tonë. Vendosja e kufijve në vitin 1913 duhet të rivlerësohet në
kohën e duhur dhe nëpërmjet një rruge paqësore”Princit Leka
II në mesazhin e urimit për festën e Vitit të Ri 2012 ka uruar të gjithë
shqiptarët kudo që janë. Më poshtë po e japim të plotë mesazhin e
Princit Leka II:
Bashkatdhetarë të dashur,
Motra dhe vëllezër,
Në këtë ditë të parë të Vitit të Ri, ju uroj Gëzuar dhe për shumë
vjet, duke shpresuar që gjatë këtij viti do të realizojë secili nga ne
projektet e veta personale dhe të gjithë së bashku projektet tona
kombëtare.
Viti që kaloi ishte i veçantë për popullin shqiptar. Përveç kremtimit
dhe festimeve që shënuan në të gjitha trojet shqiptare dhe në diasporë
100-vjetorin e Pavarësisë, kthimi në Atdhe i eshtrave të Mbretit Zog dhe
ngritja e monumentit të tij, dëshmuan se shteti shqiptar ka marrë
tashmë një orientim të ri. Vlerësimi që iu bë figurave historike tregon
se herët a vonë e drejta dhe e vërteta del në drite.
Për mua ky ishte një vit reflektimi. Ndarja nga jeta e babait tim,
Mbretit Leka I, ishte një moment i vështirë për Familjen Mbretërore!
Falë mbështetjes të Popullit Shqiptar kam gjetur forcë dhe kam marrë
angazhimin solemn të vazhdoj rrugën e të parëve duke qenë gati të punoj
dhe jetoj në shërbim të atdheut.
Të dashur bashkatdhetarë,
Përveç arritjeve që populli shqiptar ka realizuar, na mbetet ende një
rrugë e gjatë derisa të realizojmë aspiratat e rilindasve dhe
patriotëve tanë drejt bashkimit kombëtar. Kudo në trojet etnike faktori
shqiptar është bërë me i rëndësishëm, madje po bëhet më vendimtar dhe po
gëzon mbështetjen e aleatëve tanë të natyrshëm. Duhet të dimë t’i
kalojmë divergjencat politike apo krahinore si edhe interesat e ngushta,
për ti dhënë përparësi projekteve afatgjata të popullit dhe kombit.
Jo gjithmonë historia ka qenë në favorin tonë. Vendosja e kufijve në
vitin 1913 duhet të rivlerësohet në kohën e duhur dhe nëpërmjet një
rruge paqësore. Kjo nuk nënkupton qëndrimin pasiv të popullit shqiptar,
përkundrazi. Duke rritur nivelin politiko-ekonomik, shoqëror e
demokratik kudo që ndodhen shqiptarët, hyrja në Europë do të na gjejë
një komb më të begatshëm, më të fuqishëm, më dinjitoz, më të përgatitur e
më të besueshëm për realizimin e kesaj ëndërre të madhe .
Padyshim në këtë proces jo të lehtë Familja Mbretërore do të ketë
rolin e saj të pazëvendësueshëm si simbol i unitetit kombëtar. Ne do të
mbështesim çdo iniciativë në këtë drejtim dhe çdo nismë në mbrojtje të
drejtave të shqiptarëve kudo që ata ndodhen, Shqipëri, Kosovë, Maqedoni,
Mal të Zi, Çamëri, Luginën e Preshevës dhe trojet e tjera etnike.
Edhe një herë, Gëzuar Vitin e Ri. Zoti ju dhëntë shëndet, lumturi dhe
begati në familjet tuaja dhe e pastë në mbrojtjen e vet popullin dhe
kombin shqiptar, thuhet në mesazhin e nëshkruar nga Princ Leka II.
/Telegrafi/
No comments:
Post a Comment